Meistaramót 15-22 ára fór fram 15.-16. febrúar í Laugardalshöllinni. HHF átti tvo keppendur á mótinu sem var mjög fjölmennt og greinilegt að frjálsar íþróttir eru í mikilli sókn á landsvísu. Tryggvi Sveinn Eyjólfsson keppti í þrem greinum og Victoría Rós Sæmundsdóttir í sex greinum. Tryggvi bætti sinn besta tíma í 60 metra spretthlaupi er hann hljóp á 7.76 sek sem er næst besti tími HHF innanhúss í flokki 17 ára og eldri. Tryggvi nældi sér í bronsverðlaun í 60 metra grindahlaupi á tímanum 9.20 sek og var nærri búinn að bæta eigið héraðsmet sem er 9.17 sek. Victoría setti tvö héraðsmet á mótinu. Annað átti hún fyrir í 300 metra hlaupi en hún stórbætti það um nærri 3 sek en nýja metið er á tímanum 53.67 sek. Hitt héraðsmetið setti hún í þrístökki þegar hún bætti metið um 14 cm þegar hún stökk 8.55m.

Við óskum þeim innilega til hamingju með frábæran árangur á mótinu. 

Keppendur 11 og 12 ára kepptu í fjölþrautar fyrirkomulagi þar sem keppt er í fimm greinum og fá iðkendur stig fyrir þann árangur sem þau ná í hverri grein og í lokin er allt lagt saman og sá sem stendur efstur hlýtur sæmdarheitið Íslandsmeistari í fjölþraut. Einnig er veitt viðurkenning fyrir 10 efstu svo það er eftir miklu að keppa að komast í topp 10 á Íslandi í sínum aldursflokki. HHF var með 7 keppendur í þessum aldursflokkum. Michael Thor Sæmundsson varð í 8. sæti samanlagt í flokki 11 ára drengja, hjá 12 ára drengjum varð Sæmundur Óli Davíðsson í 4.-5. sæti og Óskar Elí Ísaksson í sæti númer 8. Sannarlega glæsilegur árangur hjá þeim og hinum sem kepptu fyrir okkar hönd og enduðu líka mjög ofarlega og sýndu miklar framfarir og bætingar. Spennandi sumar framundan hjá þessum flottu krökkum. 

Í flokki 13-14 ára er keppt í hefðbundnum greinum og hlýtur sigurvegari hverrar greinar sæmdarheitið Íslandsmeistari. Við í HHF vorum með 7 keppendur í þessum aldursflokkum.

Frábær árangur vannst á mótinu og fór þar fremstur í flokki Íþróttamaður ársins hjá HHF Daníel Már Ólafsson en hann vann sigur í þrem greinum í flokki 13 ára pilta, ásamt einu silfri og tvö brons. Daníel setti einnig mótsmet í þrístökki þegar hann stökk 9.85 m. Algjörlega frábært mót hjá honum.

Frosti Þór Ásgeirsson varð Íslandsmeistari í hástökki 14 ára pilta. Aðrir keppendur HHF voru með miklar bætingar og nálægt því að komast á verðlaunapall. Þetta er ótrúlega flottur og öflugur hópur sem eftir er tekið. Á þessu móti settu þau samtals 4 héraðsmet. Fanndís Fía Pálsdóttir 12 ára í 400 m, Frosti Þór Ásgeirsson 14 ára í þrístökki og Daníel Már Ólafsson 13 ára í langstökki og þrístökki.

Á þessu móti eru félög að keppa sín á milli um að verða stigahæsta liðið. Keppt er til stiga í hverjum aldursflokki en einnig heildarstig og það lið telst Íslandsmeistari sem stendur hæst.

Við í HHF unnum glæsilegan sigur í flokki 13 ára pilta án þess að eiga möguleika á að keppa í síðustu greininni sem var boðhlaup en þar þarf 4 keppendur. Þessi sigur er einn sá stærsti sem HHF hefur unnið í liðakeppni og erum við ótrúlega stolt af þessum drengjum þeim Daníel Má Ólafssyni og Alexander Nóa Ásgeirssyni fyrir að vinna þetta afrek gegn mikið fleiri andstæðingum. 

HHF endaði síðan í 7. sæti í heildarkeppninni af 17 liðum sem er frábær árangur. En árangur kemur ekki af sjálfum sér. Þessi hópur er samviskusamur og duglegur að æfa og það skilar sér. Þeir bæta sem mæta !

Stórmót ÍR var haldið helgina 18.-19. janúar 2025 í Laugardalshöllinni í Reyjavík við frábærar aðstæður. Stórmót ÍR er alþjóðlegt mót og er sérstaklega vandað til verka við framkvæmdina. Auk Íslendinga voru þar voru keppendur frá Færeyjum og Bretlandi. 

HHF sendi fjölmennasta hóp keppenda sem héraðið hefur sent á þetta mót eða alls 21 keppandi á aldrinum 6 til 18 ára. Keppendur stóðu sig öll frábærlega og voru mörg persónuleg met slegin. Einnig voru alls 7 ný héraðsmet sett á þessu fyrsta móti ársins og gefur árangur allra sem tóku þátt góð fyrirheit um framhaldið á íþróttaárinu 2025.

Daníel Már er frábær íþróttaiðkandi, með mikla íþróttahæfileika og hefur náð góðum árangri á landsmælikvarða í sinni íþróttagrein. Árangrar hans eru framúrskarandi og sjá þjálfarar miklar bætingar milli ára. Daníel Már hefur mikinn vilja til að verða enn betri íþróttamaður og leggur sig allan fram í að sinna æfingum til þess að gera enn betur en síðast.

 
Á árinu 2024 var árangur hans eftirfarandi:

Gautaborgarmeistari í kúluvarpi

Tvöfaldur Unglingalandsmótsmeistari

Frjálsíþróttamaður ársins

Besta afrek ársins á Íslandi 12 ára pilta í hástökki, þrístökki og kúluvarpi

Annað besta afrek ársins á Íslandi 12 ára pilta í 60m hlaupi

Ný rafíþróttadeild hefur verið stofnuð innan ÍFB og er gert ráð fyrir að æfingar hefjist 7. janúar fyrir 12 ára og eldri.

Deildin er með æfingahúsnæði við Hafnarbraut  10 í húsnæði Arctic fish. Skráning er í gegnum abler.

Ný bogfimideild hefur verið stofnuð innan ÍH. Dagana 18.-19. desember kom Bogfimisamband Íslands með námskeið fyrir þjálfara ásamt kynningu fyrir börn og fullorðna.

Vel var mætt á kynninguna og munu æfingar hefjast í janúar. Skráning verður opnuð fljótlega og í gegnum abler.

Jólamót HHF í frjálsum innanhúss var haldið í Bröttuhlíð 28. desember 2024. Fyrirkomulagið var með svipuðum hætti og undanfarin tvö ár en 9 ára og yngri voru fyrir hádegi og 10 ára og eldri eftir hádegi. Mótið gekk mjög vel fyrir sig og stóðu krakkarnir sig einstaklega vel. Um 20 iðkendur tóku þátt og er það fjölgun á milli ára. 12 ný héraðsmet voru sett á mótinu og er greinilegt hversu mikið þeim fer fram á milli ára.

Yngri hópurinn spreytti sig í þrautabraut þar sem hefðbundnar greinar voru prófaðar og allir fengu þátttökupening í verðlaun. Í eldri hópnum var keppt í langstökki og þrístökki án atrennu, hástökki, kúluvarpi, skutlukasti og langhlaupi. Veitt voru verðlaun fyrir þrjá efstu í hverri grein.

Einnig gaf Orkubú Vestfjarða, einn af samstarfsaðilum HHF, öllum sem tóku þátt á mótinu íþróttapoka að gjöf og þökkum við þeim kærlega fyrir veittan stuðning.

Meistaramót 11-14 ára fór fram 10.-11. febrúar 2024. Við erum aftar stolt af öllum keppendum en við vorum með 13 þátttakendur skráða á mótið, hinsvegar forfölluðust tveir vegna veikinda á seinustu stundu. Fengum við mikið hrós og athygli fyrir fjölda þátttakenda en við vorum meira að segja fleiri en UFA frá Akureyri.

Við áttum þrjá keppendur í topp tíu í 11 og 12 ára flokkum í fjölþraut. Nokkra í toppsætum í greinum og margir persónulegir sigrar, það er akkúrat það sem við viljum sjá, bætingar á milli móta. Í stigakeppninni var HHF í 8. sæti af 17 þátttökuliðum sem telst mjög góður árangur miðað við lítið lið.

Áfram HHF !!

HHF var með 10 keppendur á Stórmóti ÍR 20.-21. janúar og stóðu þau sig öll frábærlega. Miklar bætingar voru hjá krökkunum og við erum svo stolt af þeim öllum. Fyrst og fremst sigur að mæta til keppni, það krefst hugrekkis að mæta í stóru höllina og taka þátt.

Framtíðin er björt hjá HHF !!