Fréttir
ÍSÍ og UMFÍ leita að sextán hæfileikaríkum og metnaðarfullum einstaklingum með brennandi áhuga á íþróttastarfi á Íslandi til að taka þátt í að byggja upp öflugt starf íþróttahéraða á öllu landinu.
Starfsmennirnir verða staðsettir á átta svæðastöðvum um allt land en tveir starfsmenn verða á hverri stöð.
Horft er til þess að starfsmennirnir sextán muni vinna saman sem einn þar sem styrkleikar og hæfileikar hvers og eins verða nýttir.
Starfsfólk svæðastöðva tekur þátt í að skapa tækifæri og þróa árangursríkt íþróttaumhverfi fyrir börn - og ungmenni, fá tækifæri til að vinna að fjölbreyttum verkefnum sem miða að því að hámarka tækifæri barna og ungmenna til íþróttaiðkunar.
Starfsemi svæðastöðva byggir á teymishugsun þar sem samvinna, fagmennska og framsækni í sterkri liðsheild er grundvallaratriði.
45. Héraðsþing HHF
Laugardaginn 9. mars síðastliðinn fór fram 45. Héraðsþing HHF á Vegamótum á Bíldudal. Þingið fór vel fram og sköpuðust góðar umræður. Vakti Birna Hannesdóttir, formaður HHF, athygli á því í skýrslu stjórnar, að mikilvægt væri að skoða aðstöðumál til íþróttaiðkunar á svæðinu og gera úttekt til þess að hægt sé að móta stefnu til framtíðar með sveitarfélögunum með úrbótum.
Jóhann Steinar Ingimundarson formaður UMFÍ og Andri Stefánsson framkvæmdastjóri ÍSÍ voru gestir á fundinum og veittu þeir heiðranir til félagsmanna okkar sem sjá má fyrir neðan.
Allir stjórnarmeðlimir buðu sig fram áfram og var það samþykkt. Fundargerð og öll skjöl fundar má finna hér.
Silfurmerki ÍSÍ - Björg Sæmundsdóttir
Björg hefur setið í stjórn HHF og hefur einnig starfað til margra ára fyrir Íþróttafélagið Hörð og fyrir Golfklúbb Patreksfjarðar. Hún er starfandi formaður GP í dag og hefur setið í stjórn síðan 2007. Hún er ötull talsmaður golfíþróttarinnar á svæðinu og hefur unnið óeigingjarnt starf til þess að byggja upp íþróttina á svæðinu. Björg hefur verið óslitið frá unga aldri viðloðandi íþróttastarfið á svæðinu fyrst sem keppandi, svo foreldri og alla tíð gengt stjórnarstöðum fyrir íþróttafélagið sitt. Björg er ekki bara flínkur golfari heldur sér hún um að halda golfvellinum í sem bestu standi og er hún oft fram á nætur að gera völlinn kláran fyrir næsta dag.
Gullmerki ÍSÍ - Margrét Brynjólfsdóttir
Magga starfaði í stjórn Íþróttafélagsins Harðar á Patreksfirði í 16 ár og hélt starfinu gangandi með miklum sóma. Hún var formaður meirihluta þess tíma. Hún tók einnig við sem formaður Hrafnaflóka eftir að hún hætti sem formaður ÍH en þurfti frá að hverfa vegna persónulegra aðstæðna. Hún hefur spilað stóran þátt í íþróttastarfinu á svæðinu. Magga barðist líka fyrir bættri aðstöðu til æfinga og keppni og þau mannvirki standa enn fyrir sínu.
Starfsmerki UMFÍ - Ásdís Guðjónsdóttir, Guðrún Helga og Valgerður Jónasdóttir, langstökks þríeykinu
Ásdís, Gunna Helga og Vala eru hluti af því sem við köllum langstökks þríeykið. En þær unnu á öllum frjálsíþróttamótum í langstökkinu til margra ára. Þær hafa staðið vaktina og verið ómetanlegur stuðningur við frjálsíþróttastarf Hrafna-flóka. Keppendur Hrafna-flóka tengja góðar minningar gagnvart þeim. Röggsemi, hvatning og örugg framkvæmd langstökks í höndum þeirra þriggja.
Gullmerki UMFÍ - Heiðar Ingi Jóhannsson
Heiðar hefur unnið ötult starf á vegum íþróttahreyfingarinnar á sunnanverðum Vestfjörðum. Hann var einn af þeim sem endurreistu Héraðssambandið HHF árið 1980. Hann hefur setið í varastjórn og aðalstjórn HHF frá þeim tíma. Hann hefur einnig setið í stjórn UMFT og GBB og hann hefur þar tekið sæti formanns í báðum félögum. Hann situr enn í varastjórn HHF og er formaður GBB. Hann hefur áður fengið starfsmerki UMFí árið 1997 fyrir að hafa starfað í þágu íþrótta í 17 ár og nú eru árin orðin 44 og hann er enn að.
Hér má sjá rafræna kveðju frá Ólafi Sveini sem flutt var á Héraðsþingi HHF.
Meistaramót Íslands 11-14 ára
Meistaramót 11-14 ára fór fram 10.-11. febrúar. Við erum aftar stolt af öllum keppendum en við vorum með 13 þátttakendur skráða á mótið, hinsvegar forfölluðust tveir vegna veikinda á seinustu stundu. Fengum við mikið hrós og athygli fyrir fjölda þátttakenda en við vorum meira að segja fleiri en UFA frá Akureyri.
Við áttum þrjá keppendur í topp tíu í 11 og 12 ára flokkum í fjölþraut. Nokkra í toppsætum í greinum og margir persónulegir sigrar, það er akkúrat það sem við viljum sjá, bætingar á milli móta. Í stigakeppninni var HHF í 8. sæti af 17 þátttökuliðum sem telst mjög góður árangur miðað við lítið lið.
Áfram HHF !!
Stórmót ÍR
HHF var með 10 keppendur á Stórmóti ÍR 20.-21. janúar og stóðu þau sig öll frábærlega. Miklar bætingar voru hjá krökkunum og við erum svo stolt af þeim öllum. Fyrst og fremst sigur að mæta til keppni, það krefst hugrekkis að mæta í stóru höllina og taka þátt.
Framtíðin er björt hjá HHF !!