GP Trackman mótaröðin

Golfvertíðinni lýkur ekki á Patreksfirði ⛳

Þótt sumarið sé á enda er golfstarfið á Patreksfirði langt frá því að fara í vetrardvala. Golfklúbbur Patreksfjarðar heldur úti öflugu starfi í golfhermi í vetur og nú er að hefjast GP TrackMan mótaröðin 2026–2027.

Mótaröðin samanstendur af 13 mótum yfir veturinn þar sem þátttakendur fá að spreyta sig á fjölbreyttum golfvöllum í Evrópu og Bandaríkjunum – allt án þess að yfirgefa Patreksfjörð.

Fyrir jól verður ferðast um golfvelli Evrópu en eftir áramót færist keppnin yfir til Bandaríkjanna. Nýr völlur verður kynntur þegar hvert mót opnar og því verður alltaf smá óvænt spenna í loftinu.

Nýtt mót opnar á tveggja vikna fresti og stendur hvert mót yfir í tíu daga. Spilaðar eru 18 holur og fá þátttakendur tvær tilraunir þar sem betra skorið gildir. Keppt er bæði í punktakeppni og höggleik og 10 bestu mót hvers keppanda af 13 telja til heildarstiga.

Verðlaun verða veitt fyrir heildarárangur í bæði punktakeppni og höggleik að mótaröðinni lokinni.

Starfið er skemmtileg leið til að halda golfinu gangandi yfir vetrarmánuðina, skapa samveru og keppni og gefa kylfingum tækifæri til að halda sér við efnið þótt íslenskt vetrarveður taki við.

Fyrsta mótið hefst á mánudaginn og fram undan er því spennandi golfvetur hjá Golfklúbbi Patreksfjarðar. 🏌️‍♀️🏌️‍♂️⛳